|
23
Hydref 2003
YN ÔL I’R GORFFENNOL
Cynhaliodd y Cyngor Llyfrau ei Chynhadledd Llyfrau Plant gyntaf
bum mlynedd ar hugain yn ôl yng Ngregynog ar y thema
‘Plant a’u Darllen’, ac y mae’n briodol
fod y gynhadledd yn dychwelyd i Bowys eleni gan ddilyn yr
un thema.
Unwaith eto bydd cyfle i’r gynulleidfa glywed nifer o
awduron amlwg yn trafod eu gwaith a’r pleser y maent
yn ei gael o ysgrifennu llyfrau i bobl ifanc.
Cyflwynir y ddarlith agoriadol ar y nos Wener gan Alan Gibbons,
enillydd y Blue Peter Award yn 2000 am ei gyfrol Shadow of
the Minotaur. Bu’r nofel honno ar restr fer gwobr
Carnegie yn 2001 a’i nofel The Edge ar restr fer Carnegie
yn 2003.
Ceir cyflwyniadau hefyd gan nifer o nofelwyr ifanc gan gynnwys
Gwyneth Glyn, Caryl Lewis, Nia Jones, Anwen Francis ac Aled
Richards, a cheir cyfle gwych i’w clywed yn trafod eu
profiadau yn ysgrifennu.
Un o uchafbwyntiau’r gynhadledd eleni fydd cyflwyno Tlws
Mary Vaughan Jones i Elfyn Pritchard gan gydnabod ei gyfraniad
arbennig i lenyddiaeth plant yng Nghymru dros nifer o flynyddoedd.
Eleni, cafodd hefyd ei anrhydeddu am nofel i oedolion, gan
ennill Gwobr Goffa Daniel Owen yn Eisteddfod Genedlaethol
Meifod am ei nofel Pan Ddaw’r Dydd …?.
Bydd gwobrau Tir na n-Og hefyd yn cael eu cyflwyno yn y gynhadledd;
y rhain yw’r prif wobrau llenyddiaeth a gyflwynir yn
flynyddol i awduron llyfrau plant yn y categorïau canlynol:
Ffuglen Orau’r Flwyddyn, Llyfr Gorau’r Flwyddyn
ac Eithrio Ffuglen, a Llyfr Saesneg Gorau’r Flwyddyn.
‘Gyda’r holl awduron hyn yn bresennol, fe fydd hi’n
siw?r o fod yn gynhadledd arbennig,’ meddai Menna Lloyd
Williams, Pennaeth Adran Llyfrau Plant Cyngor Llyfrau Cymru.
‘Y mae’r gynhadledd bob amser yn gyfle gwych i bobl
sydd â diddordeb mewn llenyddiaeth plant ddod at ei
gilydd, ac i roi sylw penodol i’r maes pwysig hwn.’
Cynhelir y gynhadledd eleni yng Ngwesty’r Metropole,
Llandrindod, nos Wener/dydd Sadwrn 7–8 Tachwedd.
Gellir cysylltu â’r Cyngor Llyfrau yn Aberystwyth
am fwy o wybodaeth a chopi o’r ffurflen gofrestru.
Am fanylion pellach cysyllter ag: Elwyn Jones, Pennaeth
Gweinyddiaeth a Chysylltiadau Cyhoeddus, Cyngor Llyfrau Cymru,
Castell Brychan, Aberystwyth, Ceredigion SY23 2JB
T (01970) 624151 F (01970) 625385 elwyn.jones@cllc.org.uk
|
