CYFEILLION Y CYNGOR LLYFRAU

Beth yw’r Cyfeillion?

• Sefydlwyd Cyfeillion Cyngor Llyfrau Cymru ym 1995, gyda’r bwriad o greu grŵp o gefnogwyr i waith y Cyngor yn gyffredinol, ac yn arbennig felly eu hymdrech i hybu llyfrau Cymraeg a Chymreig.
  
  
• Trwy gysylltu’n rheolaidd â’r Cyfeillion, mae’r Cyngor Llyfrau yn gallu cyflwyno iddynt yr wybodaeth ddiweddaraf am y byd llyfrau yng Nghymru, a hynny am dâl aelodaeth o £15 y flwyddyn.
  
  
• Erbyn hyn, mae’r Cyfeillion yn mynd o nerth i nerth, gan gynnal cyfarfodydd blynyddol yng nghwmni rhai o’n llenorion amlycaf. Eisoes, bu Jan Morris, Emyr Humphreys a’r diweddar R. S. Thomas yn trafod eu gwaith a’r dylanwadau a fu ar eu cynnyrch llenyddol.
  
  
• Y mae gan y Cyfeillion eu cylchgrawn eu hunain yn ogystal, sef Y Cyfaill, dan olygyddiaeth Lyn Lewis Dafis o Aberystwyth. Mae’r cylchgrawn hwn yn llawn pytiau diddorol am y byd llyfrau yng Nghymru, ac am ddiddordebau llenyddol rhai o’r aelodau.
  
  
• Cadeirydd cyntaf Cyfeillion y Cyngor Llyfrau oedd y diweddar Alun Creunant Davies, cyn-Gyfarwyddwr y Cyngor Llyfrau a fu farw yn 2005.

Llywyddion Anrhydeddus
 
Mae tri o brif lenorion Cymru wedi derbyn yr anrhydedd o fod yn Llywyddion Anrhydeddus i Gyfeillion Cyngor Llyfrau Cymru, sef Islwyn Ffowc Elis, Emyr Humphreys a Jan Morris.

Mae cyfraniad y tri yn arbennig iawn i fyd llenyddiaeth Cymru gan mor amrywiol a gwahanol eu gyrfaoedd a’u cynnyrch. Fel nofelydd arloesol y meddylir am Islwyn Ffowc Elis yn bennaf, a gwyddom hefyd am ei gyfraniad pwysig fel beirniad llenyddol.  Daeth Emyr Humphreys i amlygrwydd fel nofelydd ifanc gan ddatblygu hefyd yn fardd a dramodydd teledu.  Fel awdur taith y derbyniodd Jan Morris sylw rhyngwladol, ond y mae bellach wedi cyhoeddi nifer o lyfrau’n ymwneud yn benodol â Chymru.
 
Y mae’r tri Llywydd Anrhydeddus wedi cofnodi eu diolch a’u gwerthfawrogiad o dderbyn yr anrhydedd:

	Un o’r storïau mwyaf cyffrous yn hanes ein diwylliant yw datblygiad Cyngor Llyfrau Cymru.  Ac yn awr mae gan y Cyngor gorff niferus o Gyfeillion i’w gynnal a’i gefnogi.  Braint fawr i unrhyw un yw cael bod yn un o lywyddion y Cyfeillion hyn.’ Islwyn Ffowc Elis
	‘Yn yr oes hon o ddatblygiadau technolegol a chysylltiadau byd-eang mae’r llyfr yn parhau yn gyfrwng holl bwysig.  Y mae’n dda gweld felly bod gennym y Cyngor Llyfrau i hybu llyfrau o Gymru.’ Emyr Humphreys
	‘Mae bodolaeth y Cyngor Llyfrau nid yn unig yn bwysig o safbwynt cyhoeddi llyfrau yn y ddwy iaith yng Nghymru, ond y mae’n ddatganiad bod y genedl yn rhoi bri ar un o’r elfennau pwysicaf, y gair ysgrifenedig.’ Jan Morris

Swyddogion y Cyfeillion

Cadeirydd: Tegwyn Jones
Is-Gadeirydd: Brynley F. Roberts
Ysgrifennydd: Lyn Léwis Dafis
Trysorydd: Richard Morgan
Aelodau'r Pwyllgor Llywio:
Marian Delyth
Un lle gwag

Y Cyfeillion ar Waith

• Caiff y Cyfeillion eu cynrychioli ar brif gorff rheoli’r Cyngor, gan gael cyfle i drosglwyddo barn a dyheadau’r aelodau.
  
  
• Bydd unrhyw roddion neu gyfraniadau a dderbynnir gan y Cyfeillion yn cael eu defnyddio i hyrwyddo gwaith y Cyngor Llyfrau.

Beth yw manteision ymuno â’r Cyfeillion?

Drwy ymuno â Chyfeillion y Cyngor Llyfrau, byddwch yn derbyn gwybodaeth reolaidd am y byd llyfrau yng Nghymru a hynny mewn pecynnau tymhorol sy’n cynnwys deunydd megis:

• Copi o’r cylchlythyr dwyieithog Y Cyfaill ddwywaith y flwyddyn – cylchgrawn bywiog a gyhoeddir yn arbennig ar gyfer y Cyfeillion.
  
• Tocyn mantais gwerth £2.50 ym mhob pecyn, i’w gyfnewid am lyfr o’ch dewis.
  
  
• Copi am ddim o’r cyfnodolyn Y Llyfr yng Nghymru, sef cyhoeddiad blynyddol Canolfan y Llyfr Aberystwyth.
  
  
• Gwahoddiad i Gyfarfod Blynyddol y Cyfeillion.
  
  
• Copïau o gatalogau llyfrau a gyhoeddir gan y Cyngor Llyfrau, yn ogystal â chatalogau a baratoir gan amryw o gyhoeddwyr yn rhestru eu llyfrau diweddaraf.
  
  
• Rhestr gyflawn o’r llyfrau fydd yn cael eu cynnig am hanner pris neu lai yn arwerthiant blynyddol y Cyngor Llyfrau.

Sut i ymaelodi

Gellir ymaelodi â’r Cyfeillion am dâl o £15 y flwyddyn, neu £125 am aelodaeth deng mlynedd. Gall aelodau am oes dalu trwy gyfamod.

Anfonwch am ragor o fanylion, a ffurflen aelodaeth, at:

Ysgrifennydd y Cyfeillion
Cyngor Llyfrau Cymru
Castell Brychan
Aberystwyth
Ceredigion SY23 2JB
Ffôn: 01970 624151 Ffacs: 01970 625385
Neu anfonwch e-bost at elwyn.jones@cllc.org.uk